قصة سيدنا صالح
 |
| قصة سيدنا صالح عليه السلام |
بعد ما ربنا نجا المؤمنين من قوم عاد ،، عاشوا مع مين !!؟
مع قوم جديد ..
وكانوا كويسين ولا برضو كانوا وحشين !!؟
يعني هيسمعوا كلام ربنا ولالا
المؤمنين عاشوا في الارض وانتشروا وبقي فيه مجموعات كتيييير من الناس..
منهم قبيلة " اسمهم قبيلة ثمود "
مين ثمود ؟؟
جدهم الأكبر
ودايما القبيلة بيسموها علي اسم أقدم جد للقبيلة..
ثمود دول عاشوا في منطقة لوحدهم في وادي مليان صخور وجبال..
اسمها " الحِجْر "
يعني إيه الحجر؟
الحجر المكان اللي سكن فيه قوم ثمود
(وهو دلوقتي في شمال السعودية في محافظة العلا)
قوم ثمود ربنا اداهم القدرة والقوة زي قوم عاد .
قوم ثمود كانوا بينحتوا الجبال ويحفروها ويعملوا منها بيوت فارهة..
يعني أية فارهة ؟
بيوت فارهة يعني بيوت ضخمة وعالية وسقفها عالي ..
بيوت قوية جدا.. محفورة جوة الجبل ..
كان عندهم قدرة عجيبة علي تقطيع الصخور وحفرها
عشان كدة ربنا قال:
وثمود الذين جابوا الصخر بالواد..
يعني ايه جابوا ؟
جابوا يعني قطعوا وخرقوا الصخر..
أما الأراضي والسهول فبنوا عليها قصور ضخمة وعظيمة ..
تخيلوا أنهم بنوا الأبنية دي من غير المعدات المعروفة لينا..
وأرضهم كانت كلها نخيل مليان تمر وعندهم حدائق وعيون مايه وأنواع زرع كتير ..
(أَتُتْرَكُونَ فِي مَا هَاهُنَا آمِنِينَ (146) فِي جَنَّاتٍ وَعُيُونٍ (147) وَزُرُوعٍ وَنَخْلٍ طَلْعُهَا هَضِيمٌ )
لكن الوقت بيعدي...
والناس بتنسي..
بتنسي نعم ربنا.. وتنسي تشكره وتعبده ..
شوية شوية حفروا أصنام من الحجارة وعبدوها
إيه دة !! دة زي ما حصل مع قوم عاد بالظبط !..
اة اصل الشيطان خطوة خطوة خلاهم يرجعوا يعبدوا الأصنام ..
الأول يعملوا تمثال لإنسان صالح بيحبوه او تمثال لاي حيوان او طائر بيحبوه...
وناس تموت وناس تعيش وييجي ناس تقول التمثال ده أهلنا عبدوه وقدسوه ..
ده ربنا اللي هنعبده..!!
لكن كان وسط ثمود عايش معاهم واحد صالح ومؤمن
اسمه أية ؟؟
سيدنا صالح ..
قبيلة ثمود كلهم كانوا بيحبوا سيدنا صالح وبياخدوا رأيه ويستشيروه في كل أمورهم ..
وكانوا عايزينه يبقي سيد عليهم
يعني رئيس وزعيم..❤
ربنا اختار سيدنا صالح إنه هو يكون النبي اللي هيذكر قبيلة ثمود ويحذرهم ❤
سيدنا صالح بدأ يتكلم معاهم .. قالهم :
يا قومي اعبدوا الله ..مالكوش إله غير ربنا اللي خلقكم .. وخلاكم تسكنوا الأرض..
استغفروا ربنا وتوبوا لربنا ..وربنا هيستجيب دعاءكم
رد قوم ثمود :
إيه الكلام ده؟ إنت جرالك إيه؟
ده إحنا كنا بنحترمك وناخد رأيك في كل أمورنا ..
لدرجة كنا هنخليك زعيم علينا
إنت عاوز تمنعنا من عبادة الأصنام اللي أجدادنا عبدوها؟؟؟
إيه الكلام اللي بتقوله ده ؟؟
ده انت ماطلعتش كويس ولا حاجة زي ماكنا فاكرين.
واحنا أصلا مش مصدقينك ..
وَإِلَى ثَمُودَ أَخَاهُمْ صَالِحًا قَالَ يَا قَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ هُوَ أَنْشَأَكُمْ مِنَ الْأَرْضِ وَاسْتَعْمَرَكُمْ فِيهَا فَاسْتَغْفِرُوهُ ثُمَّ تُوبُوا إِلَيْهِ إِنَّ رَبِّي قَرِيبٌ مُجِيبٌ * قَالُوا يَا صَالِحُ قَدْ كُنْتَ فِينَا مَرْجُوًّا قَبْلَ هَذَا أَتَنْهَانَا أَنْ نَعْبُدَ مَا يَعْبُدُ آبَاؤُنَا وَإِنَّنَا لَفِي شَكٍّ مِمَّا تَدْعُونَا إِلَيْهِ مُرِيبٍ *
مش هما كانوا عايزينه يبقي زعيم ليه اضايقوا منه ؟؟
لأنه قالهم يعبدوا ربنا وبس مش الأصنام بتاعتهم ،،
وماكنوش عارفين أنه خلاص بقي نبي ؟؟
لا لسه ..
وفي مرة من المرات سيدنا صالح لقاهم قاعدين في ناديهم ..
كان مجلس كدة بيقعدوا فيه يتجمعوا يتكلموا وياكلوا ويشربوا .
سيدنا صالح راح عشان يكلمهم فقالهم :
انا نبي من ربنا .. وربنا بعتني عشان اوضحلكم الحق وأبينه ..
وأنا واثق ان انا بقول الصح وعارف الحق عشان ربنا عرفني الحق
ولو عصيت ربنا ماحدش فيكم هينفعني
وكل اعذاركم اللي بتقولوها بأنكم بتعبدوا اللي اجدادكم عبدوه مش هتزيدكم غير ذنوب ..
قَالَ يَا قَوْمِ أَرَأَيْتُمْ إِنْ كُنْتُ عَلَى بَيِّنَةٍ مِنْ رَبِّي وَآتَانِي مِنْهُ رَحْمَةً فَمَنْ يَنْصُرُنِي مِنَ اللَّهِ إِنْ عَصَيْتُهُ فَمَا تَزِيدُونَنِي غَيْرَ تَخْسِيرٍ (63)
لكن ثمود اتكبروا انهم يسمعوا كلامه و قالوا لبعض:
ايه ده احنا هنتبع إنسان عادي زينا كده ؟ ده احنا لو احنا سمعنا كلامه نبقي غلطانين وهيعذبنا معاه!
اشمعنا هو اللي ربنا اختاره من وسطنا عشان يكون نبي ويعلم الناس الحق... ده كذاب وبيقول أي كلام...
رغم انهم عارفين سيدنا صالح كويس وعارفين انه انسان صادق وطيب وصالح وكانوا بياخدوا رأيه في كل أمورهم...
لكن اتكبروا انههم يتبعوه ويطيعوا ربنا ..
سيدنا صالح فضل يحاول معاهم .. وقالهم:
انا رسول من ربنا عشان انقلكم أوامر من ربنا .. فخافوا من ربنا انكم تعصوني وماتسمعوش كلامي...
انا مش بعمل كدة وانا مستني أي مقابل او جزاء منكم ..لأن ثوابي هيكون عند ربنا..
ربنا سايبكم في آمان في أرضكم .. ارضكم اللي ربنا رزقكم فيها بالحدائق و عيون الماية ..ومليانة زرع ونخل..
واداكم القدرة علي حفر البيوت جوة الجبال... فخافوا ربنا واطيعوني عشان ماتخسروش نعم ربنا ..
وبلاش تسمعوا كلام المجرمين المتكبرين..اللي عاوزين الفساد ومش عاوزين الخير..
فردوا عليه :
انت مسحور !! حصلك سحر خلاك تقول الكلام ده !!
انت بشر عادي زينا ومش رسول .. ولو انت صادق هات معجزة من ربنا...تكون لنا دليل علي ان صادق !!
عايزين معجزة من ربنا عشان يبان ان سيدنا صالح صادق ؟
طب ايه المعجزة اللي عاوزينها قوم ثمود ؟
سيدنا صالح قالهم : لو ربنا أرسل معجزة هتؤمنوا بيها ؟
فقالوا أيوة
فسيدنا صالح خد منهم عهد بأنهم يبقوا مؤمنين لو ربنا ارسل لهم المعجزة ..
وسألهم ايه المعجزة اللي عاوزينها؟
فرد قوم ثمود وقالوا :
شايف الصخرة اللي هناك دي ؟ صخرة ضخمة
احنا عاوزين تخرج من الصخرة دي ناقة !!!..(يعني جمل ست)
ومش أي ناقة!
عاوزنها طويلة وضخمة .!!!
وتكون عشراء (يعني تكون حامل عشر شهور وخلاص هتولد)!!!
وعاوزينها تكون بتجيب لبن يكفينا كلنا نشرب منه..!!!
وكل واحد بقى يطلب طلب .. لونها كذا .. حجمها كذا ..!
سيدنا صالح اخد منهم عهد بالإيمان لما تحصل المعجزة .
فسيدنا صالح فضل يدعي ربنا بالمعجزة اللي طلبها قوم ثمود...
ربنا هيبعتلهم الناقة اللي طلبوها وهيختبرهم ..
وفعلا .. حصلت المعجزة ...
ربنا اخرج لهم من الصخرة ناقة😍 وانشقت الصخرة عن ناقة ..❤
ناقة عظيمة وكبيرة وشكلها جميل.❤
ربنا حقق لهم المعجزة اللي طلبوها .. فكدة مافيش حجة تخليهم ما يأمنوش بربنا...
فسيدنا صالح قالهم :
يا قوم ربنا بعتلكم المعجزة اللي طلبتوها ..فاعبدوا ربنا مالكوش إله غيره ..
ناقة الله...سيبوها تاكل في الأرض زي ماهي عايزة
واوعوا تقربوها بأي شر وإلا ربنا هيبعت عليكم عذاب عظيم..
وافتكروا اللي حصل لقوم عاد ..
وافتكروا ان ربنا عطاكم القوة من بعد هلاك عاد ..
فبنيتم القصور وحفرتم في الجبال البيوت العظيمة..
و خدوا بالكم.. ماء البئر اللي بتشربوا منه هيتقسم بينكم ..
يوم الناقة هتشرب ،، ويوم انتم تشربوا من البئر ..
وفي اليوم اللي مش هتشربوا فيه الناقة هتديكم لبن يكفيكم كلكم
الناس آمنت بسيدنا صالح ... وبدؤوا يسمعوا كلامه ..
وعارفين ان ماء البئر مقسوم بينهم وبين الناقة ...
لكن شوية شوية
المتكبرين من قوم ثمود رجعوا لكفرهم ..
إزاي ؟
قوم ثمود المتكبرين المجرمين ..شافوا مجموعة من المؤمنين المساكين الضعفاء ..
فراحوا للمؤمنين الضعفاء وسألوهم :
انتم عارفين ان صالح رسول من ربنا؟
فرد المؤمنين :
أيوة احنا مؤمنين بكل الأمور اللي ربنا أرسلها لسيدنا صالح ...
فرد قوم ثمود المتكبرين بسخرية واحتقار:
احنا بقي كافرين بأي حاجة انتم تؤمنوا بيها !!
يعني كأنهم بيقولوا انتم مساكين وضعفا واحنا مانحبش نبقي معاكم ولا نبقي زينا زيكم ...
يعني لو انتم اخترتم الإيمان .. هنختار احنا الكفر ,,عشان احنا بنحتقركم وشايفين انكم اقل مننا ..!
المدينة بقي فيها فريقين فريق مؤمن بالله ومؤمن بأن سيدنا صالح نبي من الله
وفريق متكبر وكاره المؤمنين وبيفكر ازاي يتخلصوا من الناقة ومن سيدنا صالح !
.. المتكبرين قالوا ايه ده : ليه الناقة تشرب في يوم لوحدها ..؟
ليه الإزعاج ده.. دي قرفانا في حياتنا!
احنا عاوزين البئر يرجع كله لينا ..ليه تشرب في يوم مخصوص ..
وبدؤوا يفكروا إزاي يخلصوا من الناقة !!!
لكن سيدنا صالح كان دايما يحذرهم:
"ناقة الله وسقياها "
يعني اياكم تأذوا الناقة .. أو تاخدوا مايتها
سيدنا صالح فضل يحذر ثمود المتكبرين ..
لو الناقة جيتوا جنبها بأي شر ربنا هيبعت عليكم عذاب شديد ..
ليه ماتستغفروش ربنا وتعبدوه .!.
ليه عاوزين تعملوا اعمال تغضب ربنا وكأنكم بتستعجلوا العذاب ؟
فرد قوم ثمود ..
احنا متشائمين منك يا صالح ومتشائمين من المؤمنين !!!
وكان كل لما يحصل لاي حد من ثمود حاجة وحشة يقولوا :
عارفين مين السبب ؟ صالح والمؤمنين اللي معاه هما نحس 😠هما مش هيجيلنا من وراهم الا الشر 😠
سيدنا صالح رد عليهم :
تشاؤمكم ده ربنا هو اللي هيحاسبكم عليه واللي بيحصلكم ده اختبار ربنا ليكم ..
وكان فيه في المدينة تسع أشخاص ،،9 من زعماء ثمود ...
كانوا بيشجعوا الناس علي الكفر بالله والكفر بمعجزة ربنا اللي شافوها بعينيهم ..
ال 9 دول قرروا انهم يتخلصوا من الناقة ... ويقتلوها ..!
اتجمع ال9 المتكبرين المجرمين...
وقعدوا يفكروا وبخططوا ازاي هيتخلصوا من الناقة ..
وبدؤوا يقنعوا الناس بخطتهم...وان كدة البئر هيرجع كل يوم بتاعنا..
...وكل الناس وافقوا ....!!!😱
ماعدا فريق من المؤمنين ..خافوا يعصوا ربنا .. ❤
أسوأ واحد وأشر واحد وأفسد واحد في قوم ثمود ...
كان اسمه قِدار بن سالف
قالهم انا اللي هقتلها 😱
وفضل يشرب خمرة !!
لية ؟؟
عشان الخمرة بتفسد العقل و بتبوظه
عشان مايفكرش صح ولا يحس بالذنب العظيم اللي هيعمله .
وراح معاه المجرمين المتكبرين من قوم ثمود.
قِدار واللي معاه وقفوا يستنوا الناقة.. الناقة نزلت من الجبل عشان تشرب من البئر ..
..فأشر واحد ... اللي هو قِدار اخد سيفه وأول لما لقي الناقة .
هجم عليها وعقرها ..
يعني ايه عقرها ؟
يعني ضربها ضربة كسر رجلها 😢
فوقعت الناقة علي الأرض ..فقتلها.... فصوتت بصوت عالي جدا ... وماتت.😢
(إِذِ انْبَعَثَ أَشْقَاهَا (12) فَقَالَ لَهُمْ رَسُولُ اللَّهِ نَاقَةَ اللَّهِ وَسُقْيَاهَا (13) فَكَذَّبُوهُ فَعَقَرُوهَا )
طب ليه؟؟؟؟
ليه يعملوا كدة في معجزة ربنا اللي طلبوها بنفسهم وشافوها بتخرج من الصخر بعنيهم ؟
ليه يعملوا كدة وهي كانت بتسقيهم لبنها ؟ وتشرب ولادهم؟؟
ابن الناقة اما شاف اللي حصل جري للجبل وصرخ 3 صرخات حزنا علي امه..😢
فراحوا وراه المجرمين وقتلوه 😢
سيدنا صالح شاف الناقة مقتولة ..فقالهم :
قدامكم 3 أيام ... وبعدها ربنا هينزل عليكم العذاب .. ده وعد اكيد من ربنا...
ياتري سكتوا علي كده ؟
لأ
ال 9 المجرمين اللي في قوم ثمود اللي مش وراهم غير التخطيط للشر
قالوا هو صالح بيهددنا ؟
احنا هنخلص منه هو كمان زي ما عملنا في الناقة ..
هنقتله في السر .!!
والصبح هنقول لأهله ..احنا مانعرفش حاجة ولا وشوفنا حاجة ..
كانوا بيخططوا للشر ومش عارفين ان ربنا شايفهم وبيخطط لهم ..❤
ربنا اوحي لسيدنا صالح عليه السلام إنه يخرج من القرية وياخد كل المؤمنين
لأن ربنا هيرسل عليهم العذاب..
فخرج سيدنا صالح ومعاه كل المؤمنين..
لكن قبل ما يبدأ العذاب .
ربنا سبحانه وتعالي نزل حجارة من السماء علي ال9 اللي كانوا بيتفقوا علي قتل سيدنا صالح..
فقتلهم قبل الباقيين... عقاب من ربنا مخصوص ليهم ..
قوم صالح قعدوا فعلا مستنيين عذاب ربنا .
اول يوم صحيوا لقوا وشوشهم لونها مصفر ... فعرفوا ان ده وعد سيدنا صالح..
وعدي اول يوم من ال 3 أيام ..
تاني يوم صحيوا لقوا وشوشهم لونها محمر ..فعرفوا ان دي علامة علي قرب وقت عذابهم..
وعدي تاني يوم من ال 3 أيام
تالت يوم صحيوا لقوا وشوشهم مسودة .. وده كان آخر يوم من ال 3 أيام ..
في اليوم الرابع صحيوا وهما عارفين ان ده يوم العقاب ..
قعدوا في بيوتهم خايفين و مستنيين العقاب .. قاعدين ومش عارفين العذاب هييجي ازاي ..
ربنا أرسل صيحة من السماء..
صيحة يعني صوت عالي جدا ..
الأرض من تحتهم بقت بتتهز .. مش قادرين يقفوا ولا يتحركوا ولا يهربوا..
الصوت خلي اجسامهم تتفتت كأنها فتافيت خشب محروق .
ورجع سيدنا صالح عليه السلام عشان يشوف حصلهم إيه،
وبعد ما شافهم مشي وسابهم
وهو بيقول :
(يَاقَوْمِ لَقَدْ أَبْلَغْتُكُمْ رِسَالَةَ رَبِّي وَنَصَحْتُ لَكُمْ وَلَكِنْ لَا تُحِبُّونَ النَّاصِحِينَ)
وده كان عقاب قوم ثمود
اللي ربنا بعت لقوم ثمود معجزة واضحة .. ورغم كدة فضلوا الكفر ..
وربنا قال عنهم ..
وَأَمَّا ثَمُودُ فَهَدَيْنَاهُمْ
فَاسْتَحَبُّوا الْعَمَى عَلَى الْهُدَى
فَأَخَذَتْهُمْ صَاعِقَةُ الْعَذَابِ الْهُونِ بِمَا كَانُوا يَكْسِبُونَ(17)
وَنَجَّيْنَا الَّذِينَ آمَنُوا وَكَانُوا يَتَّقُونَ (18)
المصادر :
سورة الأعراف
سورة هود
سورة الشعراء
سورة النمل
سورة فصلت
سورة الذاريات
سورة القمر
سورة الحاقة
سورة الشمس