قصص الانبياء للاطفال .. قصة سيدنا أدم - الجزء الأول

قصة نبي الله آدم

 قصة سيدنا ءادم  الجزء الاول (1)

كان يا ما كان وما يحلى الكلام الا بذكر النبي؟

عليه الصلاة والسلام

 أبو البشر..
أول إنسان ربنا خلقه في الأرض.

ربنا عنده علم وحكمة وقدرة.أكبر من تفكيرنا...

وعشان كده قال للملائكة إنه هيجعل مخلوق جديد علي الأرض فقالهم:

إني جاعل في الارض خليفة 

يعني إيه خليفة ؟

يعني الإنسان هيخلف كائن تاني ربنا خلقه.. اللي هما الجن... (هيخلفه يعني هييجي من بعده) ..

 الجن عاشوا علي الأرض قبل الانسان لكن الجن أفسدوا في الارض وحاربوا بعض فربنا أمر الملائكة يبعدوا الجن للجزر البعيدة وهتكون الارض للبشر 

الملائكة كأنها كانت عارفة إن فيه مخلوقات قبل الانسان فسدت علي الارض.. اللي هما الجن.. 

و ان الملائكة برضو كأنهم متوقعين ان الانسان هيعمل كدة.ويفسد هو كمان في الأرض ،، ماكنوش يعرفوا ان هيكون من البشر انبياء وشهداء وعباد صالحين

ربنا قالهم إني اعلم ما لا تعلمون..

ربنا يعلم كل شيء وله سبب وحكمة من كل شيء بيحصل،،

وحتي لو إحنا مش عارفين السبب بنطيع ربنا لإننا عارفين إنه الخالق والأعلم من كل مخلوقاته وعنده كل الحكمة الأسباب

فربنا اخد قبضة من تراب الارض بكل ألوانه..

تراب الارض منه الابيض والاسود والبني الفاتح والغامق..

وزي ما تراب الارض ألوانه مختلفة. ،، ألوان البشر برضو مختلفة.

منهم الابيض والاسود والبني والفاتح والغامق.!!

لكن مافيش لون أفضل من لون عند ربنا.

الانسان الأفضل عند ربنا هو اللي أخلاقه طيبة وبيحب ربنا 

وبدأ خلق آدم من تراب وماء ،،بقوا  زي الصلصال ،، مجرد تمثال.

وحجمه أكبر وأطول مننا ،، وخلقه علي أحسن صورة. ضهره مفرود وجسمه قوي 

ربنا ساب آدم فترة من الزمن.  ،، مانعرفش قد إيه.

.مجرد صلصال زي التمثال !

إبليس كان شيطان ،، ربنا خلقه من النار..

بدأ  يروح يبص عليه ويدور حوليه إيه ده ؟..

 إيه المخلوق ده ؟!!

بدأ يلف حواليه..!!

 إبليس لاحظ ان المخلوق ده فاضي من جوة ،، فقال لنفسه. ده كدة يبقي مخلوق ضعيف.

إبليس حس ان المخلوق الجديد ده أقل منه وأضعف منه.

 بعد وقت من الزمن ربنا نفخ في سيدنا آدم وعطاله الروح اللي هيعيش بيها. 

ربنا علم آدم الاسماء.. كل الاسماء.

.دي شمس  دي شجرة .ده نهر علمه كل حاجة ..

 ربنا خلق الانسان عنده قدرة علي التعلم.

وعلمه اسماء كل الأشياء.. وميزه بأنه علمه 

ربنا عرض الاسماء والحاجات اللي علمها لآدم  علي الملائكة وقالهم :

أَنبِئُونِي بِأَسْمَاءِ هَٰؤُلَاءِ إِن كُنتُمْ صَادِقِينَ...

الملائكة حسوا انهم مش عارفين الاسماء دي..

وعرفوا ان ربنا ميز المخلوق ده اللي هو سيدنا الارض اللي هو هيبقي خليفة علي الارض.

 ربنا ميزه بعلم ومعرفة مش عند باقي مخلوقاته ..

الملائكة ردت باءستحياء..

قَالُوا سُبْحَانَكَ لَا عِلْمَ لَنَا إِلَّا مَا عَلَّمْتَنَا ۖ إِنَّكَ أَنتَ الْعَلِيمُ الْحَكِيمُ ..

يعني يارب احنا علمنا علي قد ما علمتنا وانت عندك العلم الواسع والحكمة والاسباب لكل حاجة بتحصل لكن احنا لأ..

ربنا أمر الملائكة بالسجود لسيدنا آدم .قالهم :

فَإِذَا سَوَّيْتُهُ وَنَفَخْتُ فِيهِ مِن رُّوحِي فَقَعُوا لَهُ سَاجِدِينَ

يعني اول لما انفخ فيه الروح.. كلكم تسجدوا لآدم..

هو السجود ده عبادة ؟..

 لا.. ده كان سجود تكريم وتحية لسيدنا آدم.. 

فأول لما ربنا نفخ الروح في آدم كل الملائكة سجدت.

إلا مييييييين!!؟

إلا ابليس واقف متكبر .

الملائكة اللي هما أكرم مخلوقات ربنا سجدت وأطاعت ربنا.. وإبليس عصى ربنا وماسجدش مع الملائكة..

ربنا سأله قَالَ ؛؛ مَا مَنَعَكَ أَلا تَسْجُدَ إِذْ أَمَرْتُكَ ؟

يعني أية اللي منعك تسجد زي ما الملائكة سجدت !! 

فرد ابليس قَالَ أَنَا خَيْرٌ مِنْهُ خَلَقْتَنِي مِنْ نَارٍ وَخَلَقْتَهُ مِنْ طِينٍ

ابليس اتكبر علي أوامر ربنا..

إبليس  لما شاف آدم وهو مخلوق من تراب وطين ،، حس انه أحسن وأعلي وأقوي منه..

ربنا قال لإبليس. :

قَالَ فَاهْبِطْ مِنْهَا فَمَا يَكُونُ لَكَ أَن تَتَكَبَّرَ فِيهَا 

يعني ما ينفعش تتكبر وتعصيني ومتسمعش كلامي ،، فجزاءك تخرج من رحمة ربنا و تعذب في جهنم..

ابليس بدل.بقي ما يستغفر ربنا او يندمرد وقال :

 قَالَ أَنظِرْنِي إِلَىٰ يَوْمِ يُبْعَثُونَ

يعني اديني فرصه بس لحد يوم القيامة

اليوم اللي هتحاسب فيه الإنسان والجن ،، هدخل المخلوق ده معايا النار هو وأولاده وأولاد أولاده 

وهفضل ورا المخلوق ده بكل الطرق عشان أخليه يعصيك زي ما أنا عصيتك.

ربنا هيعمل اختبار لآدم عشان يتعلم ويحذر من الشيطان..

ربنا قال لآدم انت هتعيش في الجنة انت وزوجتك.❤

ربنا خلق حواء عشان تكون زوجة لسيدنا آدم وام لكل البشر.❤ خلقها من ضلع آدم..

يعني أية ضلعه ؟؟

يعني حواء  كانت جزء من آدم وربنا بقدرته عطاها الروح واوممتع

الحياة في الجنة مافيهاش تعب ولا جوع. ،، كل حاجة موجودة وجميلة وسهلة وممتعة.

لكن ربنا عطي امر لآدم وحواء.

ربنا قالهم متقربوش من الشجرة دي ...

 استمتعوا بالجنة بس ماتقربوش من الشجرة دي.

 مش بس ما تكلوش. ،،لا ماتقربوش من الشجرة دي.. 

آدم وحواء فضلوا عايشين في الجنة ،، بس كل شوية الشيطان يدخلهم الجنة ويحاول يقنعهم ياكلوا من الشجرة دي..!

  الجنة طبعا مليانة فاكهه كتيييييرة جميلة ربنا جعلها ليهم وقالهم ماتقربوش من شجرة واحدة بس .

 فمارضوش يسمعوا كلام الشيطان..

 الشيطان ما وقفش..

 فضل وراهم.. يزن.. يزن ،،،، يزن .. ويسيبهم ويرجع..

 الشيطان وقف وحلفلهم انهم لو أكلوا من الشجرة مش هيموتوا ابدا وهيكونوا ملايكة وهيبقي عندهم ملك ما بينتهيش..

وقالهم انه بينصحهم ومش عاوز غير مصلحتهم.

 آدم وحواء صدقوا.. نسيوا أمر ربنا . 

وراحوا للشجرة قربوا منها وكلوا منها.

 ربنا كان خافي عنهم مكان العورة " اللي في جسمهم ومحدش ينفع يشوفها "

 فظهرت عورتهم  واتكسفوا ،، وفضلوا يقطعوا من ورق الشجر ويغطوا بيه نفسهم 

  وعرفوا انهم وقعوا في ذنب كبيييييييير أوي و إنهم مسمعوش كلام ربنا في امره والشيطان كذب عليهم.

سيدنا آدم وحواء حسوا بالذنب الكبير أوي دة وعرفوا انهم وقعوا في معصية كبيرة..

 ربنا عاتبهم وقالهم مش انا قولتلكم متقربوش من الشجرة دى وقولتلكم ان الشيطان دة عدو كبير ليكم ومتسمعوش كلامه ،،

.سيدنا آدم لما عصي ربنا مابررش زي ابليس ما برر وقال انا ما سجدش لاني احسن منه..!!

سيدنا آدم ما فضلش يبرر ذنبه وخطأه... او يقول اي اسباب خلته يعمل كدة...

سيدنا آدم فورا استغفر ربنا ورجع له وندم علي اللي ععمله

فربنا سامحه علي اللي عمله 

وده كان الاختبار والدرس  لآدم قبل ما ينزل الارض عشان يعرف مين عدوه ..

 وان ازاي مهما حصل يطيع امر ربنا حتي لو مش فاهم سببه..

 وان الشيطان عدوه للي هيحاول بكل الطرق ميسمعش كلام ربنا ويعصيه !! 

وخطوة بخطوة هيوقع الانسان في الذنوب 

عشان كدة ربنا قالنا :

وَلَا تَتَّبِعُوا خُطُوَاتِ الشَّيْطَانِ ۚ إِنَّهُ لَكُمْ عَدُوٌّ مُّبِينٌ..

ربنا تاب علي آدم وحواء ونزلهم الارض. لكن الارض غير الجنة..

 تعب وشغل عشان يوفروا اكلهم وسكنهم...  وربنا رزقهم باولاد وبنات كتييييير جدا

بس إيه إللي هيحصل بعد كدة ؟