خطة العشر الأواخر مثبتة للافادة بأذن الله كل اللي فات كوم واللي جاي كوم تاني
ومش محتاج أقول برده إن ربنا بيجددلك الفرصة إنك تعوض كل اللي فاتك وتسبق وتختم الشهر بأجمل ختام "إنما الأعمال بالخواتيم"
"كان رسول الله صلى الله عليه وسلم إذا دخل العشر أحيا الليل وأيقظ أهله وجدَّ وشدَّ المئزر" .. يعني الرسول كان بيميز الليالي دي تحديداًَ عن باقي رمضان بإحياء الليل كله بمزيد من العبادة والذكر والصلاة والقرآن
ده غير الكنز اللي فيها وهو ليلة القدر
اللي العبادة فيها بتعادل عبادة 84 سنة .. يعني عبادة ليلة واحدة بعبادة العمر كله ويمكن أكتر ! ثواب مهول في عبادة ساعات قليلة !!
علشان كده خطة العشر الأواخر حبيت إنها تكون خطة مختلفة ومش مجرد مهام مقترحة .. إنما مخطط كامل لكل ليلة منهم هتعمل فيها إيه بالظبط
ولو واظبت على المخطط ده كل ليلة منهم يبقى 100% هتكون أدركت ليلة القدر إن شاء الله وهيتكتبلك إنك كررت عبادات المخطط ده 1000 شهر كاملين .. انت متخيل ؟!
الخطة عبارة عن 10 صور (صورة لكل ليلة ) .. منها الجزء الثابت من العبادات ومنها الجزء المتغير كل ليلة
ملحوظات سريعة عن المخطط :
1- المخطط بيبدأ من بعد الفطار وصلاة المغرب وأول فقرة هتعملها هي إنك تطلع صدقة حتى لو كانت بسيطة (وجبة - فلوس - زيت وسكر - تبرع فودافون كاش بأي مبلغ - رسالة فاضية لأي مؤسسة خيرية بـ 5 جنيه) شوف اللي هتقدر عليه وطلعه لله
ولو استمريت عليها العشر ليالي يبقى انت ضمنت إنك في ليلة القدر أدخلت سرور على قلب مسلم بصدقتك وأدخلت سرور على قلب مسلم بمشاركتك معاه ثوابها (2x1)
2- هتكمل بعدها جدول العبادات سواء صلاة أو قراءة قرآن أو أوراد استغفار وصلاة على النبي (والرقم من باب التشجيع وليس التخصيص يعني لو قدرت تعمل أكتر يبقى أجمل وأجمل) .. وتكثر من دعاء "اللهم إنك عفو تحب العفو فاعفُ عني" لإنه وصية النبي عليه الصلاة والسلام
3- هتلاقي من ضمن المطلوب درس تتفرج عليه كل يوم .. خليك حريص إنك تتفرج عليه وتشجع أهلك إنهم يتفرجوا معاك .. هيفرق معاكم بشكل كبير وهتضمن إنك أخدت ثواب حضور درس علم 1000 شهر بإذن الله ..
4- بعد صلاة الفجر وجلسة الضحى اللي هتعملها للشروق بإذن الله علشان تاخد ثواب حجة وعمرة تامة كل يوم (ثواب عظيم) .. هيكون قدامك حوالي 20 دقيقة بعد الشروق علشان تقدر تصلي صلاة الضحى .. الـ 20 دقيقة دي هيكونوا تدبر لآية علمت معاك في الورد بتاعك .. هتدخل تعرف تفسيرها الاول وسبب نزولها وبعدها تشوف الوقفات التدبرية والدروس العملية المستفادة منها (وكل المصادر اللي ممكن تحتاجها هتلاقيها في موقع الباحث القرانى)
5- في أعلى الزاوية الشمال من كل صورة هتلاقي مربع "تحدي اليوم" وده عبارة عن مهمة صغيرة مطلوبة منك تعملها خلال اليوم وتشاركنا نتيجتها في رد على البوست هنا
6- وفي أسفل الزاوية الشمال من كل صورة هتلاقي مربع "ومن أحصاها" وده بنكمل فيه تدبر أسماء الله الحسنى و كل يوم هيكون مطلوب منك تدبر 3 أسماء وتدعي بيهم في دعائك علشان يزيد تعلقك بيهم .. وتختار اسم منهم تلخصلنا بأسلوبك كل اللي عرفته عنه في رد هنا
ده كده بإختصار كل اللي محتاج تعرفه عن الخطة شد حيلك
ولو وصلت لهنا اخبطنا واحدة "قد التحدي " في كومنت علشان تشجع نفسك وتشجعنا معاك
وفي انتظار ابداعاتكم كالعادة
ولا تنسونا من صالح دعائكم في الليالي الجميلة دي
خطة العشر الأواخر
ليلة العشرون من رمضان
ليلة الواحد والعشرون من رمضان
ليلة الثاني العشرون من رمضان
ليلة الثالث العشرون من رمضان
ليلة الرابع العشرون من رمضان
ليلة الخامس العشرون من رمضان
ليلة السادس العشرون من رمضان
ليلة السابع العشرون من رمضان
ليلة الثامن العشرون من رمضان
ليلة التاسع العشرون من رمضان
